ចិនប្រកាសត្រៀមធ្វើប្រតិបត្តិការយោធា ក្រោយប្រធានសភាអាមេរិកទៅដល់កោះតៃវ៉ាន់
ប្រធានសភាអាម៉េរិកលោកស្រី ណាន់ស៊ី ផេឡូស៊ី បានទៅដល់កោះតៃវ៉ាន់កាលពីយប់ថ្ងៃអង្គារ ដោយដំណើរទស្សនកិច្ចនេះ កំពុងបង្កភាពតានតឹងរវាងចិននិងអាម៉េរិក ។ ខណៈចិនអះអាងកោះតៃវ៉ាន់ជាទឹកដីរបស់ខ្លួនហើយប្រឆាំងរាល់ការទាក់ទងរវាងរដ្ឋាភិបាលតៃវ៉ាន់ជាមួយមន្ត្រីទៅពីប្រទេសផ្សេងៗ។
ក្រសួងការពារជាតិចិននៅយប់ថ្ងៃអង្គារ បានប្រកាសថា ខ្លួននឹងធ្វើប្រតិបត្តិការយោធាកំណត់គោលដៅជាបន្តបន្ទាប់ដើម្បី«ការពារអធិបតេយ្យជាតិ»ជាការឆ្លើយតបនឹងដំណើរទស្សនកិច្ចរបស់ផេឡូស៊ី។កងទ័ពចិនថែមទាំង ប្តេជ្ញារារាំងអន្តរាគមន៍ពីខាងក្រៅនិងការប៉ុនប៉ងប្រកាស«ឯករាជ្យភាពតៃវ៉ាន់»ពីសំណាក់ក្រុមផ្តាច់ទឹកដីទៀតផង។
រដ្ឋមន្ត្រីការបរទេសចិនលោកវ៉ាង យី បាននិយាយថា«អំពើក្បត់របស់រដ្ឋាភិបាលទីក្រុងវ៉ាស៊ីនតោន»អំពីបញ្ហាតៃវ៉ាន់ធ្វើអោយបាត់បង់ភាពគួរអោយទុកចិត្តថ្នាក់ជាតិរបស់អាម៉េរិក។ លោកបាននិយាយក្នុងសេចក្តីថ្លែងការណ៍មួយនៅថ្ងៃនេះថា« អ្នកនយោបាយអាម៉េរិកខ្លះកំពុងលេងជាមួយភ្លើងលើបញ្ហាតៃវ៉ាន់។ដំណើរទស្សនកិច្ចពេលនេះពិតណាស់នឹងមិននាំមកផលល្អទេ…មុខមាត់មនុស្សឆាឆៅចូលចិត្តរករឿងគេរបស់អាម៉េរិកបង្ហាញសាជាថ្មីថា គឺអាម៉េរកជាអ្នកបំផ្លាញសន្តិភាពពិភពលោកធំបំផុត»។
នៅមុនការទៅដល់បន្តិច លោកស្រីផេឡូស៊ីបាននិយាយថា ដំណើរទស្សនកិច្ចរបស់គណៈប្រតិភូអាម៉េរិក« បំពេញការប្តេជ្ញាចិត្តរបស់អាម៉េរិកក្នុងការគាំទ្រលទ្ធិប្រជាធិបតេយ្យរបស់តៃវ៉ាន់…វាគ្មានអីខុសពីគោលនយោបាយអាម៉េរិកដែលមានជាយូរមកហើយនោះទេ»។
តាមពិតដំណើរទស្សនកិច្ចនេះមិនត្រូវបានប្រកាសជាផ្លូវការទេរីឯក្រសួងការបរទេសតៃវ៉ាន់បដិសេធមិនព្រមនិយាយថាតើលោកស្រីផេឡូស៊ីមកដែរឬអត់ តែរបាំងផ្លូវត្រូវបានដាក់ជុំវិញសណ្ឋាគារហ្គ្រែន ថាយអឹត(Grand Hyatt)ក្នុងទីក្រុងតៃប៉ិ កន្លែងដែលលោកស្រីផេឡូស៊ី អាចនឹងស្នាក់នៅចំពេលអាជ្ញាធរតៃវ៉ាន់បង្កើនសន្តិសុខខ្លាំង៕
