យន្តហោះនគរបាលថៃធ្លាក់នៅហ៊ួហ៊ីន សម្លាប់មនុស្ស ៦នាក់

ថៃ – យន្តហោះនគរបាលខ្នាតតូចមួយគ្រឿងបានធ្លាក់ចូលទៅក្នុងសមុទ្រនៅជិតតំបន់រមណីយដ្ឋាន ហ៊ួហ៊ីន (Hua Hin) ខេត្ត ពេជ្របុរី (Phetchaburi) នៅព្រឹកថ្ងៃសុក្រនេះ បណ្តាលឱ្យមនុស្សទាំងអស់ដែលស្ថិតនៅលើយន្តហោះស្លាប់។

បើតាមសារព័ត៌មានថៃ យន្តហោះដែលស្ថិតក្រោមការគ្រប់គ្រងរបស់ នគរបាលជាតិថៃ បានធ្លាក់ចូលទៅក្នុងសមុទ្របន្ទាប់ពីទើបតែហោះឡើងពីដីបានប៉ុន្មាននាទីប៉ុណ្ណោះ។ តាមការបញ្ជាក់ពីអាជ្ញាធរ គ្រោះថ្នាក់នេះកើតឡើងក្នុងអំឡុងពេលធ្វើការហោះហើរសាកល្បង សម្រាប់ការហ្វឹកហាត់លោតឆ័ត្រយោង។

មនុស្សចំនួន ៦ នាក់ដែលស្ថិតនៅលើយន្តហោះ (រួមទាំងក្រុមបើកយន្តហោះ និងសមាជិកនគរបាល) ត្រូវបានអះអាងថាបានស្លាប់ទាំងអស់។ អត្តសញ្ញាណពិតប្រាកដនៃអ្នករងគ្រោះនឹងត្រូវប្រកាសជាផ្លូវការនៅពេលខាងមុខ។

ភ្លាមៗនោះ ក្រុមសង្គ្រោះបន្ទាន់ពីមជ្ឈមណ្ឌលសង្គ្រោះខេត្តពេជ្របុរី បានទៅដល់កន្លែងឧប្បត្តិហេតុនៅប្រហែលម៉ោង ០៨:១៥ ព្រឹក ប៉ុន្តែពួកគេមិនអាចជួយសង្គ្រោះអ្នករងគ្រោះបានឡើយ។ អាជ្ញាធរថៃបានចាប់ផ្តើមស៊ើបអង្កេតដើម្បីរកហេតុផលនៃគ្រោះថ្នាក់នេះ ដោយសង្ស័យថា អាចបណ្តាលមកពីបញ្ហាបច្ចេកទេស ឬកំហុសអ្នកបើកបរ។

ឧប្បត្តិហេតុនេះបានធ្វើឱ្យមានការព្រួយបារម្ភអំពីសុវត្ថិភាពអាកាសចរណ៍នៅតំបន់ហ៊ួហ៊ីន ដែលជារមណីយដ្ឋានទេសចរណ៍ដ៏ពេញនិយមមួយក្នុងប្រទេសថៃ។ អាជ្ញាធរនឹងធ្វើការពិនិត្យឡើងវិញលើស្តង់ដារសុវត្ថិភាពសម្រាប់យន្តហោះនគរបាល និងយន្តហោះស៊ីវិលដែលហោះហើរក្នុងតំបន់។

យ៉ាងណាក៏ដោយពេលនេះ ក្រុមអ្នកជំនាញកំពុងព្យាយាមរើយន្តហោះដែលធ្លាក់ចូលទៅក្នុងសមុទ្រឡើងវិញ ដើម្បីធ្វើការវិភាគបច្ចេកទេស៕