កំពុងតែបើកលើផ្លូវសុខៗ ស្រាប់តែដាច់កុងតឺន័រក្រឡាប់ធ្លាក់ពីលើផ្លូវ ធ្វើឲ្យអ្នកដំណើរភ័យស្លន់ស្លោ
រថយន្តកុងតឺន័រមួយគ្រឿង បានដាច់កន្ទុយសណ្តោយរបស់ខ្លួនក្រឡាប់ធ្លាក់ចេញពីផ្លូវ ធ្វើឲ្យអ្នកដំណើរតាមដងផ្លូវភ័យចង់លោះព្រឹលឹង។ ហេតុការណ៍នេះ បានកើតឡើងនៅព្រឹកថ្ងៃទី២៨ ខែមិថុនា ឆ្នាំ២០២១នេះ នៅតាមបណ្តោយផ្លូវជាតិលេខ៥ ចន្លោះគីឡូម៉ែត្រលេខ៩២ និង៩៣ ក្នុងភូមិទ្រាជើង ឃុំស្រែថ្មី ស្រុករលាប្អៀរជិតវិទ្យាល័យ ក្រុងកំពង់ឆ្នាំង។
រថយន្តខាងលើនេះម៉ាកហ៊ីយ៉ាន់ដាយក្បាលរថយន្តពាក់ស្លាកលេខ3- B 5163 កន្ទុយសណ្តោងពាក់ស្លាកលេខ 4 A-2330 ដឹកទំនិញពេញ ។
បុរសចំណាស់ម្នាក់ ដែលជាអ្នកបើកបររថយន្តនោះបាននិយាយថា រថយន្តគាត់បានដឹកភេសជ្ជៈរបស់ក្រុមហ៊ុនមួយនៅភ្នំពេញ ធ្វើដំណើរពីប៉ោយប៉ែតទៅភ្នំពេញ ។ លុះមកដល់ចំណុចនេះក៏ស្រាប់តែដាច់កន្ទុយសណ្ដោងចេញពីក្បាលរថយន្ត ក្រឡាប់បះ ជើងតែម្តង ប៉ុន្តែមិនបង្កឲ្យមានគ្រោះថ្នាក់ដល់អ្នកដទៃឡើយ ។
ក្រោយពេលកើតហេតុគាត់បានទូរស័ព្ទទៅម្ចាស់ក្រុមហ៊ុនភេសជ្ជៈដើម្បីយករថយន្តផ្សេង ១ គ្រឿងទៀត មកសាងទំនិញដឹកទៅគោលដៅ ទើបអាចស្ទូចទាញសណ្ដោងដែលក្រឡាប់នេះយកទៅធ្វើការជួសជុលបាន៕
