ភ្ញៀងលាយឡំជាមួយខ្យល់កន្រ្តាក់ បំផ្លាញផ្ទះបណ្តែតទឹកមួយចំនួននៅរមណីយដ្ឋានអូរខៃដន
មន្ត្រីរដ្ឋបាលក្រុងប៉ោយប៉ែត បានឲ្យដឹងថា កាលពីល្ងាចថ្ងៃទី១៥ ខែឧសភា ឆ្នាំ២០២២ មានភ្លៀង និងខ្យល់កន្រ្តាក់បានកើតឡើងនៅរមណីយដ្ឋានអូរខៃដន ស្ថិតនៅក្នុងភូមិកូនដីរី សង្កាត់និមិត្ត ដោយបណ្តាលឲ្យផ្ទះបណ្តែតទឹកប្រមាណ៨ ត្រូវខ្យល់វាយបំផ្លាញ តែមិនបណ្តាលឲ្យរងរបួសដល់មនុស្សឡើយ។
បើតាមតាមអាជីវករនៅកន្លែងកើតហេតុថា កាលពីដំបូង មេឃបង្អោរភ្លៀងមកជាធម្មតា មិនបង្កការភ្ញាក់ផ្អើលទេ ប៉ុន្តែ មួយសន្ទុះក្រោយមកស្រាប់តែ មានខ្យល់បក់មកខ្លាំងៗ និងមានខ្យល់កន្ត្រាក់ភ្លាមៗ ធ្វើឲ្យស្ពានឆ្លងតភ្ជាប់ពីកន្លែងអង្គុយលេងមួយ ទៅកន្លែងអង្គុយលេងមួយទៀតបាក់ និងកន្លែងអង្គុយលេងចំនួន៨បាក់ប៉ើងទៅលើហើយធ្លាក់ចូលទឹកអូរវិញបាក់បែកអស់តែម្ដង ឯសម្ភារមួយចំនួនទៀតក៏ត្រូវខ្យល់បក់ប៉ើងចូលទៅក្នុងទឹកអស់មួយចំនួនធំដែរ។
គួរបញ្ជាក់ថា រមណីយដ្ឋានអូរខៃដន តែងមានភ្ញៀវទៅលេងជាប្រចាំ ព្រោះនៅទីនោះមានទឹកខួបប្រាំងខួបវស្សាហូរធ្លាក់ចុះមកពីប្រទេសថៃ ឯអ្នកភូមិនៅទីនោះ បាននាំគ្នាធ្វើកន្លែងអង្គុយលេងកម្សាន្ត(កញ្ចុះ)នៅលើផ្ទៃទឹកអូរ សម្រាប់ជូនភ្ញៀវអង្គុយលេង និងពិសាភោជនាហារ៕
