ដីតំបន់អាជ្ញាធរអប្សរា ប្រជាពលរដ្ឋមិនអាចសង់សំណង់បាន តែមន្រ្តីអាចសង់ភូមិគ្រឹះបាន
(សៀមរាប)៖ ភូមិគ្រឹះមួយកន្លែងដែលគេដឹងថា គឺជារបស់ប្រធានមន្ទីរផែនការខេត្តសៀមរាប កំពុងតែសាងសង់យ៉ាងរលូននៅចំណុចភូមិវាល សង្កាត់គោកចក ក្រុងសៀមរាប ខាងកើតវត្តប្រាសាទគោកចក ប្រមាណជាង២០០ម៉ែត្រ ខណៈដែលពលរដ្ឋផ្សេងទៀតមិនអាចសាងសង់បាន ព្រោះតែទីតាំងនោះស្ថិតនៅក្នុងតំបន់អាជ្ញាធរអប្សរា។
ការសាងសង់ភូមិគ្រឹះ ក្នុងដែនគ្រប់គ្រងរបស់អាជ្ញាធរជាតិអប្សរាដោយគ្មានច្បាប់អនុញាតិនេះ ប្រជាពលរដ្ឋក្នុងតំបន់នោះ បានលើកឡើងថា ពួកគាត់ត្រឹមតែសង់ផ្ទះតូចតាចសម្រាប់រស់នៅ ឬក៏ធ្វើទ្រុងមាន់ទ្រុងទា ក៏ត្រូវបានហាមឃាត់យ៉ាងតឹងរឹងបំផុតពីអាជ្ញាធរជាតិអប្សរាដែរ តែប៊ូទិកដ៏ធំស្គឹមស្គៃរបស់លោកប្រធានមន្ទីរផែនការ បែរជាគេអាចសាងសង់បានដោយគ្មានការហាមឃាត់ឡើយ។ ជាមួយគ្នានេះ ពួកគាត់បានលើកជាសំណួរថា តើនេះជាអំណាចបុគ្គល ឬក៏មានអ្វីនៅពីក្រោយសំណង់នេះ?
ជុំវិញករណីនេះ លោក ហាក់ សុធារ៉ា ប្រធានមន្ទីរផែនការខេត្តសៀមរាប បានថ្លែងបដិសេធ ដោយថា សំណង់នេះមិនមែនជារបស់លោកឡើយ ដោយផ្ទះរបស់លោកនៅភូមិផ្សេងទេ។
យ៉ាងណាក៏ដោយ មន្ត្រីរបស់អាជ្ញាធរជាតិអប្សរាបានបញ្ជាក់ថា សំណង់ខាងលើនេះ គឺជារបស់លោក ហាក់ សុធារ៉ា ប្រធានមន្ទីរផែនការខេត្តសៀមរាប និងប្រពន្ធ ហើយកន្លងមកខាងអាជ្ញាធរអប្សរាបានចុះទៅហាមឃាត់ជាច្រើនដងហើយ តែគេនៅតែលួចសាងសង់ទាំងបំពាន ហើយពេលនេះអាជ្ញាធរជាតិអប្សរា បាននឹងកំពុងដាក់ពាក្យបណ្តឹងទៅតុលាការ ហើយរង់ចាំដីការសម្រេចពីតុលាការក្នុងការអនុវត្តរុះរើនោះ៕