ក្រសួងការពារជាតិ ៖ ភាគីថៃមិនបានគោរពកិច្ចព្រមព្រៀង ដោយបង្កើនសកម្មភាពបង្ហោះដ្រូន ចល័តអាវុធគាំទ្រ និងបង្កើនចំនួនទាហាននៅតាមព្រំដែនក្នុងភូមិសាស្រ្តខេត្តព្រះវិហារ និងឧត្តរមានជ័យ
តាមរយៈសេចក្តីប្រកាសព័ត៌មានចេញផ្សាយនៅព្រលប់ថ្ងៃទី១៧ ខែមិថុនា ឆ្នាំ២០២៥ ក្រសួងការពារកម្ពុជា បានសម្តែងការសោកស្តាយចំពោះភាគីថៃ ដែលមិនបានគោរពនូវកិច្ចព្រមព្រៀង ហើយថែមទាំងបានបង្កើនការធ្វើសកម្មភាពរំលោភបំពានលើអធិបតេយ្យ និងបូរណភាពទឹកដីកម្ពុជា ផ្ទុយពីអនុស្សារណៈយោគយល់គ្នាឆ្នាំ២០០០ (MoU2000)។
បើតាមក្រសួងការពារជាតិ ភាគីថៃបានបង្កើនសកម្មភាពបង្ហោះដ្រូន ការជីកលេណដ្ឋាន ការបង្កើន និងចល័តអាវុធគាំទ្រ និងសព្វាវុធគ្រប់ប្រភេទ ការសាងសង់ ហេដ្ឋារចនាសម្ព័ន្ធ និងបង្កើនចំនួនទាហាននៅតាមព្រំដែនក្នុងភូមិសាស្ត្រខេត្តព្រះវិហារ និងខេត្តឧត្តរមានជ័យ ដែលជាការ គំរាមកំហែងធ្ងន់ធ្ងរដល់សន្តិភាព និងសន្តិសុខនៃប្រទេសទាំងពីរ។
យ៉ាងណាក៏ដោយ កងទ័ពកម្ពុជា បានបង្ហាញការគាំទ្រជំហររបស់រាជរដ្ឋាភិបាលកម្ពុជា ក្នុងការដោះស្រាយជម្លោះតាមច្បាប់អន្តរជាតិ និងដោយសន្តិវិធី និងរក្សាជំហរយ៉ាងមុតមាំទាំងកងទ័ព ទាំងប្រជាជននៅទូទាំងប្រទេស គោរពអធិបតេយ្យរបស់ប្រទេសជិតខាង និង ប្តេជ្ញាប្រែក្លាយតំបន់ព្រំដែនទៅជាតំបន់សន្តិភាព ប៉ុន្តែមិនអនុញ្ញាតជាដាច់ខាតដល់ការប៉ុនប៉ងរំលោភឈ្លានពានពីប្រទេស ណាមួយឡើយ ហើយប្តេជ្ញាការពារបូរណភាពទឹកដីទោះជាក្នុងតម្លៃណាក៏ដោយ៕
