ចិន បង្កើតច្បាប់ថ្មី ហាមឃាត់ និងកំណត់ម៉ោងប្រើទូរស័ព្ទចំពោះក្មេងៗនៅពេលយប់
កុមារ និងក្មេងជំទង់របស់ចិន នឹងត្រូវហាមមិនឱ្យប្រើប្រាស់ទូរសព្ទស្មាតហ្វូននៅពេលយប់ នេះជាច្បាប់ថ្មីដែលបានបង្ហាញកាលពីថ្ងៃពុធទី២សីហា ក្នុងគោលបំណងប្រយុទ្ធប្រឆាំងនឹងការញៀនអ៊ីនធឺណិត។
ការរឹតបណ្តឹងនេះ នឹងត្រូវចូលជាធរមាននៅថ្ងៃទី២ ខែកញ្ញា បន្ទាប់ពីការពិគ្រោះយោបល់ជាសាធារណៈ ដោយជនណាដែលមានអាយុក្រោម១៨ឆ្នាំ នឹងត្រូវបានកាត់ផ្តាច់ពីការចូលប្រើអ៊ីនធឺណិត ដោយប្រើឧបករណ៍ចល័តនៅចន្លោះម៉ោង១០យប់ដល់ម៉ោង៦ព្រឹក។ ប្រព័ន្ធលំដាប់ថ្នាក់សម្រាប់គ្រប់គ្រងពេលវេលាប្រើប្រាស់ស្មាតហ្វូន ក៏នឹងត្រូវបានដាក់ឱ្យប្រើប្រាស់ផងដែរ ដែលមានរយៈពេលអតិបរមា៤០នាទីក្នុងមួយថ្ងៃសម្រាប់អ្នកដែលមានអាយុក្រោម៨ឆ្នាំ និង ២ម៉ោងសម្រាប់ក្មេងអាយុ១៦ និង១៧ឆ្នាំ។
ច្បាប់ថ្មីនេះស្នើឡើងដោយនិយតករអ៊ីនធឺណិតជាតិ Cyberspace Administration of China (CAC) គឺមានភាពតឹងរ៉ឹងបំផុតនៅក្នុងពិភពលោក។ CAC បានអះអាងថា៖«ច្បាប់នេះនឹងធ្វើឱ្យប្រសើរឡើងនូវតួនាទីវិជ្ជមាននៃអ៊ីនធឺណិត បង្កើតបរិយាកាសបណ្តាញអំណោយផល ការពារ និងអន្តរាគមន៍ក្នុងបញ្ហាញៀនអ៊ីនធឺណេតរបស់អនីតិជន និងណែនាំអនីតិជនឱ្យបង្កើតទម្លាប់ប្រើប្រាស់អ៊ីនធឺណិតឱ្យកាន់តែមានប្រសិទ្ធភាព»។ វិធានការនេះនឹងផ្អែកលើកិច្ចខិតខំប្រឹងប្រែងដែលមានស្រាប់ ដើម្បីពង្រឹងការការពារអនីតិជនតាមអ៊ីនធឺណិត រួមទាំងដោយពង្រឹងខ្លឹមសារសមស្របតាមអាយុ និងកាត់បន្ថយឥទ្ធិពលនៃព័ត៌មានមិនល្អ។ អាជ្ញាធរក្រុងប៉េកាំងបានបន្តបទប្បញ្ញត្តិយ៉ាងទូលំទូលាយនៃវិស័យបច្ចេកវិទ្យាក្នុងស្រុកក្នុងប៉ុន្មានឆ្នាំថ្មីៗនេះ ដោយសារតែផ្នែកមួយចំពោះការព្រួយបារម្ភអំពីហានិភ័យដែលបង្កឡើងចំពោះយុវជនដោយបច្ចេកវិទ្យាឌីជីថល៕
