អគ្គនាយកដ្ឋានគយ ទទួលបានចំណូលជាង៧៦លានដុល្លារ ពីការបង់ពន្ធលើរថយន្តអត់ពន្ធ និងរថយន្តចង្កូតស្តាំ
អគ្គនាយកដ្ឋានគយ និងរដ្ឋាករ បានចំណូលពីការបង់ពន្ធអាករលើរថយន្តចង្កូតឆ្វេងនាំចូលអត់ពន្ធ និងរថយន្តចង្កូតស្តាំ កែទៅចង្កូតឆ្វេង បានប្រមាណជាង៧៦លានដុល្លារ។ នេះបើយោងតាមការបញ្ជាក់ពីឯកឧត្តម គុណ ញឹម រដ្ឋមន្រ្តីប្រតិភូអមនាយករដ្ឋមន្ត្រី និងជាអគ្គនាយក នៃអគ្គនាយកដ្ឋានគយ និងរដ្ឋាករកម្ពុជា ថ្លែងក្នុងពិធីសន្និសីទសារព័ត៌មាន ធ្វើឡើងនៅថ្ងៃទី៧ ខែកក្កដា ឆ្នាំ២០២២។
បើតាមការលើកឡើងរបស់ ឯកឧត្តម គុណ ញឹម បង្ហាញថា លទ្ធផលនៃការប្រមូលពន្ធលើរថយន្តគ្មានពន្ធមានស្រាប់ក្នុងប្រទេស ជ្រកក្រោមស្លាកលេខផ្សេងៗ។ គិតត្រឹមថ្ងៃទី៣០ ខែមិថុនា ឆ្នាំ២០២២ អគ្គនាយកដ្ឋានគយ និងរដ្ឋាករ បានចុះទទួលប្រាក់បង់ពន្ធអាករ និងកក់ប្រាក់សម្រាប់រថយន្តចង្កូតស្តាំ ទៅចង្កូតឆ្វេង សុរបចំនួន ៩៧៥៣គ្រឿង។ ក្នុងនោះ រថយន្តចង្កូតឆ្វេងនាំចូលអត់បង់ពន្ធ មានចំនួន ២៧១៣គ្រឿង ដែលបានបង់ពន្ធអាករសរុប ៣៥លានដុល្លារ។ ចំណែក រថយន្តចង្កូតស្តាំ កក់ប្រាក់សម្រាប់កែចង្កូតឆ្វេងមានសរុប ៧០៤០គ្រឿង ដែលមានទឹកប្រាក់សរុប៤១.៥លានដុល្លារ។
គួររំលឹកផងដែរថា ក្នុងពិធីសំណេះសំណាលជាមួយប្រតិភូកីឡាអាស៊ានប៉ារ៉ាហ្គេម នៅថ្ងៃទី៦ ខែកក្កដា ឆ្នាំ២០២២ម្សិលមិញនេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានសម្រេចឱ្យម្ចាស់រថយន្តចង្កូតស្តាំចូលមកបង់ពន្ធដោយមិនចាំបាច់កែចង្កូតឆ្វេងឡើយ។ ប៉ុន្តែការអនុគ្រោះនេះ បានតែរថយន្តដែលកំពុងតែធ្វើចរាចរនៅកម្ពុជាប៉ុណ្ណោះ ចំពោះរថយន្តចង្កូតស្តាំដែលនាំចូលថ្មី គឺនឹងត្រូវចាប់យកតែម្ដង៕
