ឆេះភោជនីយដ្ឋានប្រនឌី ក្នុងសង្កាត់ទឹកល្អក់៣ រាលឆេះភោជនីយដ្ឋានមួយទៀតនៅក្បែរនោះ និងផ្ទះ២ល្វែង
កាលពីវេលាម៉ោង ១១:៥០ នាទីព្រឹក ថ្ងៃអង្គារ ទី២៥ ខែមិថុនា ឆ្នាំ២០២៤ មានករណីអគ្គិភ័យឆាបឆេះភោជនីយដ្ឋាន ប្រេន ឌី ដែលស្ថិតនៅផ្លូវលេខ២៦៥ កែងផ្លូវ១៩២ ក្រុម២៥ ភូមិ៩ សង្កាត់ទឹកល្អក់៣ ខណ្ឌទួលគោក រាជធានីភ្នំពេញ។
ករណីអគ្គិភ័យនេះ កងកម្លាំងនគរបាលបង្ការពន្លត់អគ្គិភ័យ និងសង្គ្រោះ របស់ការិយាល័យអគ្គីភ័យស្នងការដ្ឋាននគរបាលរាជធានីភ្នំពេញ បានប្រេីប្រាស់រថយន្តអគ្គិភ័យអស់ចំនួន ១៩ គ្រឿង ប្រេីប្រាស់ទឹកអស់ចំនួន ៣៨ រថយន្ត ស្មើនឹង ១៥២ម៉ែត្រគូប ទើបរលត់ទៅវិញនៅវេលាម៉ោងប្រមាណ១រសៀល។
តាមរបាយការណ៍របស់នាយកដ្ឋានបង្ការពន្លត់អគ្គិភ័យ ឱ្យដឹងថា មូលហេតុដែលបណ្តាលឱ្យកើតជាគ្រោះអគ្គិភ័យនេះ គឺបណ្តាលមកពីជាងផ្សារដែកធ្លាក់កំទិចធូបផ្សារបង្កជាអគ្គិភ័យតែម្តង ។
ក្នុងនោះបណ្តាលឱ្យខូចខាតសម្ភារៈដូចជា ឆេះហាងដែកប្រក់ស័ង្កសី ទំហំ ១៤ម៉ែត្រ x២៥ម៉ែត្រគូប ចំនួន ០១ហាង រួមមានម៉ូតូម៉ាក់ហុងដាភីស៊ីអិចចំនួន ០១គ្រឿង និងសម្ភារៈក្នុងហាងអស់ទាំងស្រុង ហើយបណ្តាលឲ្យឆេះរាលដាលដល់ ភោជនីយដ្ឋាន យីហោ បង ចំនួន ០១ ហាង ខូចខាតអស់ ៤០% ផ្ទះថ្មជាន់ទី១ ចំនួន ០២ ល្វែង ។
ដោយឡែកករណីមនុស្សស្លាប់ និងរបួស គឺមិនមាននោះទេ៕
