ម៉ូតូបុកសត្វគោឆ្លងផ្លូវបាក់កងាប់, ចុងក្រោយសមត្ថកិច្ចដឹកគោទៅសាលាស្រុក ខណៈអ្នកបើកម៉ូតូចូលពេទ្យ
កាលពីវេលាម៉ោងប្រមាណ៧យប់ ថ្ងៃទី៣០ ខែតុលា ឆ្នាំ២០២២ មានករណីគ្រោះថ្នាក់ចរាចរណ៍មួយបានកើតឡើងនៅតាមបណ្តោយផ្លូវជាតិលេខ២ ចំណុចភូមិពូនភ្នំ ឃុំត្រពាំងសាប ស្រុកបាទី ដោយម៉ូតូមួយគ្រឿង បានបុកសត្វគោដែលឆ្លងផ្លូវ បណ្តាលឱ្យសត្វគោនោះបាក់កងាប់ ចំណែកអ្នកបើកបរម៉ូតូរងរបួសបាក់ដងកាំបិត។
ករណីនេះ គេមិនឃើញម្ចាស់គោចេញមុខមកទទួលខុសត្រូវឡើយ ដូច្នេះសមត្ថកិច្ច នៃអធិការដ្ឋាននគរបាលស្រុកបាទី បានត្រឹមធ្វើកំណត់ហេតុ រួចដឹកសត្វគោនោះទៅអធិការដ្ឋាន ខណៈអ្នកបើកបរម៉ូតូត្រូវដឹកទៅកាន់មន្ទីរពេទ្យ។
បើតាមសេចក្តីរាយការណ៍ អ្នកបើកបរម៉ូតូដែលរងរបួស រស់នៅភូមិជន្លាត់ដៃ ឃុំរវៀង ស្រុកសំរោង ខេត្តតាកែវ ជិះម៉ូតូម៉ាកសង់ឌ្រីម ពាក់ស្លាកលេខ ភ្នំពេញ-1TJ 6955 បានរងរបួសត្រង់ដងកាំបិតយ៉ាងធ្ងន់ធ្ងរ។
យ៉ាងណាក៏ដោយករណីនេះ ជាសារព្រមានមួយចំពោះម្ចាស់សត្វពាហនៈទាំងឡាយ សូមចាប់ចង និងមើលថែសត្វពាហណៈរបស់ខ្លួនឱ្យបានល្អ ដោយកុំបណ្តោយឱ្យដើរពាសវាលពាសកាល ដែលអាចបណ្តាលឱ្យមានគ្រោះថ្នាក់ដល់អ្នកដែលធ្វើដំណើរតាមផ្លូវ។ បើយោងតាមច្បាប់ចរាចរណ៍ផ្លូវគោក ម្ចាស់សត្វពាហនៈដែលបណ្តែតបណ្តោយឱ្យសត្វរបស់ខ្លួនដើរពាសវាលពាសកាលបង្ករជាហេតុកើតគ្រោះថ្នាក់ដល់អ្នកដទៃ នឹងត្រូវទទួលខុសត្រូវចំពោះមុខច្បាប់៕
