សម្តេចតេជោចារឲ្យបណ្តេញលោក សាន្ត ប៊ុនធឿន ចេញពីក្របខណ្ឌកងយោធពលខេមរភូមិន្ទជាបន្ទាន់
ក្នុងចំណារលើលិខិតលោកនាយឧត្តមសេនីយ៍ ហ៊ីង ប៊ុនហៀង កាលពីថ្ងៃទី១៨ ខែសីហា ឆ្នាំ២០២២ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានស្នើដល់សម្តេច ទៀ បាញ់ រដ្ឋមន្រ្តីក្រសួងការពារជាតិ ធ្វើការបណ្តេញលោក សាន្ត ប៊ុនធឿន និងលោក ហ៊ត ប៉ូ ជាបន្ទាន់ចេញពីក្របខណ្ឌកងយោធពលខេមរភូមិន្ទ។
បើយោងតាមលិខិតរបស់លោកនាយឧត្តមសេនីយ៍ ហ៊ីង ប៊ុនហៀង មេបញ្ជាការ នៃបញ្ជាការរដ្ឋានអង្គរក្ស បានលើកឡើងថា លោក សាន្ត ប៊ុនធឿន និងលោក ហ៊ត ប៉ូ តែងតែបង្កហេតុធ្វើឲ្យប៉ះពាល់ដល់កិត្តិយសអង្គភាព និងមានការថ្នាំថ្នាក់ដល់ប្រជាពលរដ្ឋ ដោយអង្គភាពបានហៅមកធ្វើការអប់រំជាច្រើនលើក ច្រើនសារ តែមិនព្រមកែប្រែ។ ដូច្នេះដើម្បីជៀសវាងការលំបាក និងធ្វើឲ្យប៉ះពាល់ដល់អង្គភាពទៅថ្ងៃក្រោយបន្តទៀត ទើបលោកសុំការសម្រេចពីសម្តេចតេជោ ដើម្បីលុបឈ្មោះនាយទាហានទាំងពីរចេញពីក្របខណ្ឌកងយោធពលខេមរភូមិន្ទ។
ជាមួយគ្នានេះដែរ បើយោងតាមទំព័រ facebook របស់សម្តេចតេជោនាយករដ្ឋមន្រ្តីនៅថ្ងៃនេះដែរ ក៏បានបង្ហោះនូវវីដេអូរបស់លោក សាន្ត ប៊ុនធឿន ដែលគេដឹងថា គឺជាអ្នកសារព័ត៌មានម្នាក់ដែរនៅលើបណ្តាញសង្គម ក្នុងស្ថានភាពស្រវឹង រួចធ្វើការ live តាមទំព័រ facebook។ សម្តេចតេជោបានសរសេរថា «ចរិតពាលរបស់សាន ប៊ុនធឿនប្រាកដជាមិនអាចកែប្រែបានឡើយ។ដើម្បីជួយដល់សាន ប៊ុនធឿននិងប្រពន្ធកូនខ្ញុំ និងភរិយាបានជួយលុយដើម្បីសាន ប៊ុនធឿន ទិញផ្ទះនៅ ថែមទាំងផ្តល់លុយជូន សាន ប៊ុនធឿន៥០០ដុល្លារក្នុងមួយខែតាំង ពីឆ្នាំ២០១៨មក។ ខ្ញុំធ្លាប់បានអប់រំសាន ប៊ុនធឿនកុំឱ្យសុីផឹកជេរបញ្ចោរតែចរិតមនុស្សនេះកែមិនឡើង ឡើយ។ ដើម្បីជៀសវាងនូវការយល់ច្រឡំណាមួយកើតឡើងថ្ងៃនេះខ្ញុំបានបញ្ជាឱ្យមេបញ្ជាការអង្គរក្សស្នើសុំបណ្តេញ សាន ប៊ុនធឿនចេញពីក្របខណ័្ឌកងទ័ព»៕
