ល្បែងជល់មាន់ បើកលេងដោយសេរីនៅឃុំពត់សរ ខណៈអាជ្ញាធរបិទភ្នែកមិនអើពើ
(តាកែវ) ៖ បើទោះបីជាអាជ្ញាធរស្រុកបាទីបានអះអាងពីការបង្រ្កាបល្បែងស៊ីសង ដើម្បីភូមិឃុំមានសុវត្ថិភាពក៏ដោយ ប៉ុន្តែល្បែងជល់មាន់ដ៏ពេញនិយមនៅតែគេបើកលេងយ៉ាងគគ្រឹកគគ្រេងជាដដែល ដូចជាទីតាំងជល់មាន់ដុះស្លែងស្ថិតនៅក្នុងឃុំពត់សរ នៃស្រុកបាទីជាដើម។
ទីតាំងជល់មាន់ដុះស្លែមួយនេះ ត្រូវគេលេងនៅក្រោមម្លប់ជ្រៃកណ្តាលវាលស្រែ ដែលគេអាចសម្គាល់បានតាមរយៈម៉ូតូជាច្រើនតម្រៀបគ្នានៅតាមដងព្រែក និងមនុស្សជួបជុំគ្នាយ៉ាងអឺងកងនៅទីទួលក្រោមម្លប់ដើមជ្រៃ ក្នុងឃុំពត់សរ ដែលអាជ្ញាធរអាចមើលឃើញយ៉ាងច្បាស់ ប៉ុន្តែគេមិនបង្រ្កាបនោះឡើយ។ ដូច្នេះ តើទីតាំងមួយនេះមានខ្នងបង្អែកយ៉ាងណា ទើបអាជ្ញាធរមិនបង្រ្កាប?
បើតាមប្រភពពីអ្នកលេងល្បែងខ្លះថា ទីតាំងល្បែងមួយនេះ ជារបស់អ្នកមានលុយម្នាក់ ដែលគេបានរៀបចំសំណែនដល់អាជ្ញាធររួចរាល់ហើយ ទើបជាមិនមានការបង្រ្កាបនោះ។ តាមប្រភពដដែលថា ដើម្បីអាចបើកទីតាំងល្បែងដោយគ្មានការរំខានពីសមត្ថកិច្ចយ៉ាងដូចនេះបាន ជាដំបូងគេត្រូវទាក់ទងទៅកាន់សមត្ថកិច្ចពាក់ព័ន្ធនៅក្នុងមូលដ្ឋានពីថ្នាក់ស្រុក ដល់ថ្នាក់ឃុំ ដោយត្រូវរៀបចំជាសំណែនប្រចាំខែ ទើបទីតាំងនោះអាចបើកលេងសុខសាន្តគ្មានការរំខាន ព្រោះថា សមត្ថកិច្ចមូលដ្ឋានលោកដឹងណាស់ថាទីតាំងណាមានលេងល្បែងស៊ីសង ព្រោះជាមូលដ្ឋានរបស់គេ។
ចំពោះករណីយើងមិនអាចសុំការបំភ្លឺពីលោក ម៉ែន វណ្ណា មេប៉ុស្តិ៍នគរបាលឃុំពត់សរបានទេនៅថ្ងៃនេះ។
គួរបញ្ជាក់ដែរថា នៅក្នុងឃុំពត់សរ មិនមែនមានតែទីតាំងជល់មាន់កណ្តាលវាលស្រែនេះប៉ុណ្ណោះទេ គឺនៅមានទីតាំងល្បែងជាច្រើនទៀត ដែលខ្លះមានលេងជារបៀបជល់មាន់តាមអនឡាញ ខ្លះទៀតមានលេងជាល្បែងបៀរ អាប៉ោងជាដើម ដែលអាជ្ញាធរមូលដ្ឋាន ពិសេសលោកមេប៉ុស្តិ៍ឃុំពត់សរដឹងយ៉ាងច្បាស់ ប៉ុន្តែមិនបង្រ្កាប ដែលនេះ ត្រូវមហាជនសន្និដ្ឋានថា ប្រហែលជាលោកមេប៉ុស្តិ៍ទទួលបានសំណែនច្រើនហើយមើលទៅ ទើបជាមិនព្រមបង្រ្កាបសោះ។
សូមបញ្ជាក់ថា ដើម្បីធានាឲ្យជនគ្រប់រូប និងសង្គមទាំងមូល មានសុវត្ថិភាពយ៉ាងល្អប្រសើរ ជីវភាពរុងរឿង និងសុខដុមរមនា រាជរដ្ឋាភិបាលបានសម្រេចដាក់ចេញនូវគោលនយោបាយភូមិឃុំមានសុវត្ថិភាព ចំនួន៧ចំណុច ដោយតម្រូវឲ្យអាជ្ញាធរចាំបាច់ត្រូវអនុវត្តដើម្បីភាពសុខសាន្តរបស់ប្រជាពលរដ្ឋ ក្នុងនោះរួមមាន ៖ ទី១-ផ្ដល់សេវាសាធារណៈ ជាពិសេសសេវារដ្ឋបាលប្រកបដោយគុណភាព តម្លាភាព និងទទួលបានជំនឿទុកចិត្ត។ ទី២-គ្មានបទល្មើស លួច ឆក់ ប្លន់ គ្រឿងញៀន ល្បែងស៊ីសងខុសច្បាប់ និងបទល្មើសគ្រប់ប្រភេទ។ ទី៣-មានសណ្ដាប់ធ្នាប់សាធារណៈល្អ ជាពិសេសគ្មានគ្រោះថ្នាក់ចរាចរណ៍។ ទី៤-គ្មានអំពើអនាចារ គ្មានការជួញដូរមនុស្ស ពិសេសស្ដ្រីនិងកុមារ គ្មានអំពើហិង្សាក្នុងគ្រួសារ និងគ្មានក្មេងទំនើង។ ទី៥-ដោះស្រាយវិធានការនៅមូលដ្ឋានក្រៅប្រព័ន្ធតុលាការប្រកបដោយគុណភាព និងប្រសិទ្ធភាព។ ទី៦-មានអនាម័យ មានសោភ័ណភាពល្អ និងមានបរិស្ថានល្អ និងទី៧-ឆ្លើយតបបានទាន់ពេលវេលាចំពោះគ្រោះមហន្ដរាយ និងរាល់ជំងឺឆ្លងរាតត្បាតកាចសាហាវប្រកបដោយប្រសិទ្ធភាព។
បើយោងតាមគោលនយោបាយភូមិឃុំមានសុវត្ថិភាពទាំង៧ចំណុចខាងលើ ល្បែងស៊ីសងខុសច្បាប់ គឺស្ថិតនៅក្នុងចំណុចទី២នៅក្នុងគោលនយោបាយនោះ ដូច្នេះប្រសិនបើអាជ្ញាធរមិនបានចូលរួមក្នុងការទប់ស្កាត់ បង្រ្កាបល្បែងស៊ីសងនោះទេ គឺប្រៀបបាននឹងការប្រឆាំងទៅនឹងគោលនយោបាយភូមិឃុំមានសុវត្ថិភាពដែលបានដាក់ចេញដោយរាជរដ្ឋាភិបាលហើយ៕
