សម្តេច ស ខេង ៖ ក្រសួងកំពុងគិតគូរលើកលែងការឃុំខ្លួនរង់ចាំនីតិវិធីតុលាការ ចំពោះបទល្មើសស្រាលៗ
ថ្លែងក្នុងជំនួបពិភាក្សាការងារជាមួយនឹងអ្នករាយការណ៍ពិសេសទទួលបន្ទុកសិទ្ធិមនុស្សនៅកម្ពុជា តាមប្រព័ន្ធវីដេអូ កាលពីពេលថ្មីៗនេះ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ មានប្រសាសន៍ថា ពេលនេះក្រសួងមហាផ្ទៃកំពុងយកចិត្តទុកដាក់ខិតខំកសាងហេដ្ឋារចនាសម្ព័ន្ធបន្ថែមដើម្បីដោះស្រាយបញ្ហានេះ និងកំពុងតែគិតគូរការលើកលែងនូវការឃុំខ្លួនរង់ចាំនីតិវិធីតុលាការចំពោះបទល្មើសស្រាលៗមួយចំនួន ដើម្បីរួមចំណែកកាត់បន្ថយភាពចង្អៀតណែនបានមួយផ្នែករបស់ពន្ធនាគារ។
បើតាមប្រសាសន៍របស់សម្តេច ស ខេង បច្ចុប្បន្នចំនួនអ្នកជាប់ឃុំនៅកម្ពុជាមានប្រមាណជាង៣ម៉ឺននាក់ ក្នុងនោះជាង៥០ភាគរយជាអ្នកជាប់ឃុំមានការពាក់ព័ន្ធករណីគ្រឿងញៀន។
គួរបញ្ជាក់ដែរថា បើយោងតាមអង្គការលើកលែងទោសអន្តរជាតិ ជាង៧២%នៃអ្នកទោសទាំងអស់នៅក្នុងប្រទេសកម្ពុជា ត្រូវបានរាយការណ៍ថា បានជាប់ឃុំខ្លួនបណ្តោះអាសន្នរង់ចាំសវនាការ ហើយមនុស្សរាប់ពាន់នាក់ផ្សេងទៀត ត្រូវបានឃុំខ្លួនពីបទល្មើសលហុអហិង្សា ដូចជាការប្រើប្រាស់ ឬកាន់កាប់គ្រឿងញៀនជាដើម៕
