អ្នកជាប់និទ្ទេស Aមាន៤៤៣នាក់ទុយិភូមិ២០១៩
បើតាមសេចក្តីប្រកាសរបស់ក្រសួងអប់រំយុវជននិងកីឡាបានឲ្យដឹងថាបេក្ខជនប្រឡងជាប់មានចំនួន៧៩ ០៥២នាក់ ស្នើនឹង៦៨.៦២ភាគរយ ធៀបនឹងឆ្នាំ២០១៨ ដែលអ្នកជាប់បាក់ឌុបមានប្រមាណ៦៧.០៧ភាគរយ។ សម្រាប់បាក់ឌុបឆ្នាំ២០១៩នេះ មានបេក្ខជន ដែលទទួលបាននិទ្ទេស A មានចំនួន ៤៤៣នាក់ ធៀបនឹងឆ្នាំ២០១៨ មានតែ៤០៨នាក់។ និទ្ទេស B មានចំនួន ២ ៤៣០នាក់ ធៀបនឹងឆ្នាំ២០១៨ មានចំនួន២ ២២២នាក់។ ចំណែកនិទ្ទេស C មានចំនួន ៥ ៨៤៧នាក់ និទ្ទេស D មានចំនួន ១៤ ១០០នាក់ និងនិទ្ទេស E មានចំនួន ៥៦ ២៣២នាក់។
ក្នុងចំណោមបេក្ខជនដែលទទួលបាននិទ្ទេស A ចំនួន៤៤៣នាក់ មកពីរាជធានីភ្នំពេញ១៤១នាក់ សៀមរាប ៣៨នាក់ បាត់ដំបង ៣២នាក់ តាកែវ ២៩នាក់ កំពង់ចាម២៧នាក់ ព្រៃវែង២៧នាក់ បន្ទាយមានជ័យ២៥នាក់ កណ្តាល២៣នាក់ កំពត២៣នាក់ ត្បូងឃ្មុំ១៥នាក់ កំពង់ធំ១៤នាក់ ព្រះសីហនុ១៣នាក់ ស្វាយរៀង៨នាក់ ពោធិសាត់៧នាក់ កំពង់ឆ្នាំង៦នាក់ កំពង់ស្ពឺ៦នាក់ ក្រចេះ៤នាក់ រតនគិរី២នាក់ កោះកុង១នាក់ មណ្ឌលគិរី១នាក់ និងឧត្តរមានជ័យ១នាក់។ក្រសួងអប់រំតាមរយៈសេចក្តីប្រកាសព័ត៌មានរបស់ខ្លួនបញ្ជាក់ថា ដំណើរការនៃការប្រឡង ទាំងដំណើរការសំណេរ កំណែ និងស្រង់បូកពិន្ទុដោយកុំព្យូទ័របានប្រព្រឹត្តទៅប្រកបដោយជោគជ័យ ពុំមានឧបទ្ទវហេតុអ្វីគួរឲ្យកត់សម្គាល់ឡើយ។គួររំលឹកថា កាលពីឆ្នាំ២០១៨ កន្លងទៅ ក្រោយពីការប្រកាសលទ្ធផលភ្លាម សិស្សានុសិស្សមួយចំនួនបាននាំគ្នាតវ៉ា ដើម្បីស្នើសុំសើរើលទ្ធផលនៃការប្រឡងមុខវិជ្ជាគណិតវិទ្យា។
ជាលទ្ធផលនៃការតវ៉ានោះ ក្រសួងអប់រំ បានរកឃើញបញ្ហាបច្ចេកទេស ដោយសារកម្មវិធីកុំព្យូទ័រមិនបានបូកស្រង់ពិន្ទុមុខវិជ្ជាគណិតវិទ្យារបស់បេក្ខជនចំនួន៧៤០បន្ទប់ ដែលធ្វើឲ្យលទ្ធផលសិស្សជិត២ម៉ឺននាក់មានការប្រែប្រួល។សូមបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិឆ្នាំ២០១៩ បានប្រព្រឹត្តទៅកាលពីថ្ងៃទី១៩ ដល់ថ្ងៃទី២០ ខែសីហា មានមណ្ឌលប្រឡងទូទាំងប្រទេសសរុប ២០២មណ្ឌល និងមានបេក្ខជនចុះឈ្មោះក្នុងបញ្ជីសរុប ១១៧ ០៤៣នាក់៕
