ក្រសួងកសិកម្ម និងក្រសួងពាណិជ្ជកម្ម ស្នើសម្តេច ហ៊ុន សែន អនុញ្ញាតនាំចូលសត្វជ្រូកពីប្រទេសថៃ ១លានក្បាលក្នុងមួយ១ឆ្នាំ
ក្រសួងកសិកម្ម និងក្រសួងពាណិជ្ជកម្ម កាលពីពេលថ្មីៗនេះ បានដាក់សំណើររួមគ្នាទៅកាន់សម្តេច ហ៊ុន សែន នាយករដ្ឋមន្ត្រីនៃកម្ពុជា ដោយសុំការអនុញ្ញាតនាំចូលសត្វជ្រូកសាច់រស់ចំនួន ត្រឹមតែ ១លានក្បាលក្នុងមួយឆ្នាំ ពីប្រទេសថៃ ដែលជាការកាត់បន្ថយជាង៥០ភាគរយ នៃចំនួននាំចូលកន្លងមក ហើយការនាំចូល១លានក្បាលនេះក្រសួងទាំង២អះអាងថា ដើម្បីត្រៀមស្បៀងបម្រុងទុកសម្រាប់តម្រូវការនៅក្នុងស្រុក។
លិខិតស្នើសុំដែលចុះហត្ថលេខាដោយរដ្ឋមន្ត្រីក្រសួងកសិកម្ម និងក្រសួងពាណិជ្ជកម្ម បានគូសបញ្ជាក់ថា ក្នុងស្ថានភាពជំងឺ កូវីដ-១៩ កំពុងរីករាលដាលយ៉ាងឆាប់រហ័សនៅទូទាំងសកលលោក តំបន់ និងនៅកម្ពុជាផងដែរ បានបង្កជាផលប៉ះពាល់ដល់ផលិតកម្មតូចតាច ជីវភាពរស់នៅ និងសុវត្ថិភាពស្បៀងអាហាររបស់ប្រជាពលរដ្ឋ។
ដូច្នេះដើម្បីត្រៀមស្បៀងបម្រុងទុកសម្រាប់តម្រូវការនៅក្នុងស្រុកឱ្យបានគ្រប់គ្រាន់ សំដៅធានាសន្តិសុខស្បៀង និងស្ថិរភាព តម្លៃសត្វ-សាច់ក្នុងដំណាក់កាលដែលមានផលប៉ះពាល់ជាសកល ដែលនឹងអាចអូសបន្លាយរយៈពេលយូរនោះ ក្រសួងកសិកម្ម រុក្ខាប្រមាញ់ និងនេសាទបាន អនុវត្តតាមអនុសាសន៍របស់សម្តេច ហ៊ុន សែន ដោយត្រូវពិនិត្យលទ្ធភាពកាត់បន្ថយការនាំចូល និងរៀបចំគោលនយោបាយបង្កើនការដាំដុះ បន្លែ ចិញ្ចឹមត្រី និងចិញ្ចឹមសត្វ។
ក្រសួងកសិកម្មបានអះអាងថា ក្រសួងបានកាត់បន្ថយចំនួនជ្រូកនាំចូលពី បរទេសពី ២០ ៤០០ក្បាល/១ថ្ងៃ មកនៅត្រឹមចំនួន ៦ ៣០០ក្បាល/១ថ្ងៃ ។ ការកាត់បន្ថយការនាំចូលមួយរយៈពេលនេះមក តម្លៃជ្រូករស់ មានការកើនឡើង និងការផ្គត់ផ្គង់ក្នុងស្រុកមានស្ថេរភាព ក្នុងរង្វង់ចន្លោះពី ១១ ០០០រៀល ទៅ ១២ ៨០០រៀលក្នុង មួយគីឡូក្រាម។
យ៉ាងណាក៏ដោយ ចំពោះសុំណើររបស់ក្រសួងកសិកម្ម និង ក្រសួងពាណិជ្ជកម្មនេះវិញ លោក វេង សាខុន រដ្ឋមន្រ្តីក្រសួងកសិកម្មបានអះអាងថា សំណើរនោះត្រូវបានសម្តេច ហ៊ុន សែន ប្រមុខនៃរាជរដ្ឋាភិបាលកម្ពុជា ឯកភាពទទួលយកជាផ្លូវការហើយ ហើយទន្ទឹមនឹងនេះ កម្ពុជាក៏មានសមត្ថភាពចិញ្ចឹមជ្រូកផ្គត់ផ្គង់ទីផ្សារបានរហូតជាង ៨៥% ទៅហើយ៕
