ល្ងាចមិញ រថយន្តដឹកកម្មករបុកគ្នានៅផ្លូវជាតិលេខ៤១ មានស្លាប់ និងរបួសជាច្រើននាក់
នគរបាលខេត្តកំពង់ស្ពឺ បានឲ្យដឹងថា កាលពីវេលាម៉ោងប្រមាណ៦និង៣០នាទីល្ងាចថ្ងៃទី១១ ខែសីហា ឆ្នាំ២០២១ មានករណីរថយន្តដឹកកម្មករ (ឡានកូរ៉េ ២,៥តោន) បានបុកជាមួយរថយន្តមួយគ្រឿងទៀត ស្ថិតនៅគីឡូម៉ែត្រលេខ៣ ផ្លូវជាតិលេខ ៤១ ភូមិសំរោង ឃុំត្រពាំងគង ស្រុកសំរោងទង។
រថយន្តដឹកកម្មករ-កម្មការិនី មានគ្នាប្រមាណ ៦០នាក់ ហើយនៅក្នុងឧប្បវហេតុនោះ បណ្ដាលឱ្យកម្មករស្លាប់ម្នាក់នៅនឹងកន្លែង (ប្រុស) ជិះនៅផ្នែកខាងក្រោយ និងមានកម្មការិនី ស្លាប់ចំនួន ២នាក់ទៀត នៅពេលបន្ទាប់។ ក្រៅពីនោះក៏មានអ្នករបួសធ្ងន់ប្រមាណ ១៥នាក់ និងរបួសស្រាលជាច្រើននាក់ទៀតផងដែរ។
ក្រោយពេលគ្រោះថ្នាក់ចរាចរណ៍ កងកម្លាំងនគរបាល បានចុះទៅសម្របសម្រួលចរាចរណ៍ និងជួយអន្ដរាគមន៍បញ្ជូនអ្នករបួសទៅកាន់បន្ទប់សង្រ្គោះ នៅគ្លីនិកឯកជនមួយដែលនៅជិតនោះ និងបន្ដជួយសង្រ្គោះអ្នករបួសធ្ងន់ទៅកាន់មន្ទីរពេទ្យបន្ដទៀត៕
