ពុទ្ធបរិស័ទ្ទផ្ទុះការមិនពេញចិត្ត ក្រោយមានការតែងតាំង ភិក្ខុ ញឹម សុភា ជាចៅអធិការវត្តកំពង់ហ្លួង
ខណៈអាជ្ញាធរស្រុកអង្គរបុរី បានធ្វើការប្រកាសតែងតាំង ភិក្ខុ ញឹម សុភា ជាចៅអធិការវត្តកំពង់ហ្លួង ស្ថិតនៅក្នុងឃុំអង្គរបូរី កាលពីចុងសប្តាហ៍នេះ ក៏មានលោកតាលោកយាយជាពុទ្ធបរិស័ទ្ទចំណុះជើងវត្ត បានធ្វើញត្តិមិនគាំទ្រ។
ក្នុងញត្តិនោះ បានលើកឡើងដោយបដិសេធមិនគាំទ្រចំពោះសាលាគណខេត្តតាកែវ ដែលបានចេញសេចក្តីសម្រេចតែងតាំង ភិក្ខុ ញឹម សុភា ជាចៅអធិការវត្តសំបួរសាគរ ហៅវត្តព្រៃផ្គាំ ឲ្យឡើងជាអធិការវត្តកំពង់ហ្លួង ដែលមិនបានប្រជុំឯកភាពឲ្យស្រុះស្រួលគ្នាជាមួយអាចារ្យ គណៈកម្មការ និងមេវេន ព្រមទាំងពុទ្ធបរិស័ទចំណុះជើងវត្តកំពង់ហ្លួង។
ពុទ្ធបរិស័ទ្ទដែលផ្តិតមេដៃនៅក្នុងញត្តិនោះ ក៏បានសម្តែងការមិនគាំទ្រចំពោះភិក្ខុ ញឹម សុភា ដោយថា អសមត្ថភាពគ្រប់គ្រង ដឹកនាំ ឲ្យឡើងជាចៅអធិការវត្តកំពង់ហ្លួង ហើយថា ពួកគាត់នឹងមិនអនុញ្ញាតឲ្យគង់នៅវត្តកំពង់ហ្លួងបន្តទៀតបានឡើយ។
ចំពោះករណីនេះ យើងមិនអាចស្វែងរកការបំភ្លឺពីសាលាគណខេត្តតាកែវបានទេនៅថ្ងៃនេះ ចំពោះករណីតែងតាំងភិក្ខុ ញឹម សុភា ជាចៅអធិការវត្តកំពង់ហ្លួង ដោយគ្មានការឯកភាពពីគណៈកម្មការវត្ត និងពុទ្ធបរិសទ្ទចំណុះជើងវត្តនោះ។
បើតាមសេចក្តីរាយការណ៍ថា ក្នុងការចុះតែងតាំងភិក្ខុ ញឹម សុភា ជាចៅអធិការវត្តកំពង់ហ្លួង ដែលធ្វើឡើងកាលពីថ្ងៃទី២០ ខែសីហានោះ គេឃើញការធ្វើពិធីតែងតាំងបានធ្វើឡើងយ៉ាងប្រញាប់ប្រញាល់បំផុត ដោយមានការចូលរួមពីបាឡាត់ គណៈគណខេត្តតាកែវ អនុគណស្រុកអង្គរបុរី អភិបាលរងទទួលបន្ទុកការងារសាសនា សាមណេរសង្ឃ យុវជនក្មេងវត្តជាដើម៕
