អាងកូនជាមន្រ្តីនៅស្នងការខេត្តតាកែវ យាយម៉ុច បើកវង់ល្បែងក្បែររបងវត្តស្រែរនោង ដោយមិនខ្លាចសមត្ថកិច្ច សូម្បីអធិការស្រុកត្រាំកក់ក៏មិនហ៊ាន
តាកែវ ៖ ប្រហែលដោយសារអាងអំណាចកូនធ្វើការនៅស្នងការនគរបាលខេត្តតាកែវ ឬក៏បានបង់លុយទៅឲ្យសមត្ថកិច្ចនៅស្រុកត្រាំកក់ហើយក៏មិនដឹង វង់ល្បែងមួយកន្លែងស្ថិតនៅក្បែររបងវត្តស្រែរនោង ក្នុងឃុំស្រែរនោង ស្រុកត្រាំកក់ ដែលគេដឹងថា ជារបស់យាយម៉ុច បានបើកលេងទាំងថ្ងៃទាំងយប់ ដោយមិនមានសមត្ថកិច្ចណាទៅក្បែរនោះទេ។
បើតាមសេចក្តីរាយការណ៍ ទីតាំងល្បែងមួយនេះ បើកលេងជាច្រើនខែឆ្នាំមកហើយ គឺពេលថ្ងៃពួកគេនាំគ្នាសំងំលេងក្រោមតង់ក្បែរគុម្ភឫស្សីខាងក្រោយផ្ទះយាយម៉ុច ហើយពេលយប់ទើបពួកគេនាំគ្នាមកលេងនៅលើផ្ទះ។ ទីតាំងល្បែងនេះ គេលេងចាក់ភ្នាល់លុយរាប់ពាន់ដុល្លារ រហូតដល់អ្នកខ្លះអស់ម៉ូតូ អស់ឡានថែមទៀតផង។
ទោះជាមានការបើកលេងទាំងយប់ទាំងថ្ងៃយ៉ាងណាក៏ដោយ ប៉ុន្តែ អាជ្ញាធរមូលដ្ឋានមិនហ៊ានបង្ក្រាបនោះទេ ដោយប្រភពខ្លះថា វង់ល្បែងនេះ ជាឆ្នាំបាយរបស់មេ ម្យ៉ាងទៀតឮថា យាយម៉ុច ដែលជាម្ចាស់ផ្ទះអាងកូនរបស់ខ្លួនធ្វើជាមន្ត្រីប៉ូលីសបម្រើការងារនៅស្នងការដ្ឋាននគរបាលខេត្តតាកែវទៀតផង៕
