សប្តាហ៍នេះ កម្ពុជាអាចនឹងមានភ្លៀងក្នុងកម្រិតពីខ្សោយទៅបង្គួរ រួមជាមួយផ្គរ រន្ទះ និងខ្យល់កន្រ្តាក់
ក្រសួងធនធានទឹក និងឧតុនិយម បានឱ្យដឹងថា នៅក្នុងសប្តាហ៍នេះ ពោលគឺពីថ្ងៃទី២៣ ដល់ថ្ងៃទី២៩ ខែមីនា ឆ្នាំ២០២២ កម្ពុជាអាចនឹងមានភ្លៀងក្នុងកម្រិតពីខ្សោយទៅបង្គួរ លាយឡំទៅដោយផ្គរ រន្ទះ និងខ្យល់កន្រ្តាក់ផងដែរ។
បើតាមក្រសួងធនធានទឹក លក្ខណៈស្ថានភាពបែបនេះ គឺដោយសារតែព្រះរាជាណាចក្រកម្ពុជាយើង ទទួលរងនូវឥទ្ធិពលពីជ្រលងសម្ពាធទាប (ឥណ្ឌា) និងខ្យល់បក់មកពីទិសអាគ្នេយ៍ ដែលនាំមកនូវសំណើមពីសមុទ្រចិនខាងត្បូង។
ក្នុងនោះបណ្តាខេត្តនៅតំបន់វាលទំនាបកណ្តាល អាចនឹងមានសីតុណ្ហភាពពី២៤ ទៅ៣៦អង្សាសេ ហើយអាចនឹងមានភ្លៀងធ្លាក់លាយឡំទៅដោយផ្គរ រន្ទះ និងខ្យល់កន្រ្តាក់ ។ ដោយឡែកនៅថ្ងៃទី២៨-២៩ ខែមីនា ភ្លៀងនឹងមានសន្ទុះកើនឡើង។
សម្រាប់បណ្តាខេត្តជាប់ជួរភ្នំដងរែក និងខ្ពង់រាបឦសាន សីតុណ្ហភាពអាចមានពី២៣ ទៅ៣៦អង្សាសេ ហើយក៏អាចមានភ្លៀងក្នុងកម្រិតពីខ្សោយទៅបង្កួរ លាយឡំទៅដោយផ្គរ រន្ទះ និងខ្យល់កន្រ្តាក់ផងដែរ។
ដោយឡែកសម្រាប់តំបន់មាត់សមុទ្រវិញ សីតុណ្ហភាពអាចមានពី ២៣ ទៅ៣៤អង្សាសេ ព្រមជាមួយនឹងការធ្លាក់ភ្លៀងក្នុងកម្រិតពីខ្សោយទៅបង្កួរ ហើយនៅថ្ងៃទី២៨-២៩ ខែមីនា ភ្លៀងនឹងមានសន្ទុះកើនឡើង៕
