ក្រសួងការងារបានចេញសេចក្តីជូន ដំណឹងអនុញ្ញាតឲ្យជនបរទេសនៅកម្ពុជា អាចប្រកបមុខរបរឬធ្វើការងារបានធម្មតាឡើងវិញ
ក្រសួងការងារនិងបណ្តុះបណ្តាលវិជ្ជាជីវៈ បានចេញសេចក្តីជូនដំណឹងថ្មីមួយដោយ អនុញ្ញាតឲ្យជនបរទេសនៅកម្ពុជាអាច ប្រកបមុខរបរឬធ្វើការងារបានធម្មតាឡើងវិញ។ សេចក្តីសម្រេចនេះបានលុបលើសេចក្តីប្រកាសមួយកាលពីខែសីហាស្តីពីការកំណត់ប្រភេទមុខរបរនិងការងារដែលត្រូវបានហាមឃាត់ចំពោះជនបរទេសចំនួន១០ប្រភេទ។ សេចក្តីសម្រេចថ្មីនេះបានលើកហេតុផលចំនួន០២ទី១.គឺដោយយោងលើតម្រូវការកម្លាំងពលកម្មជំនាញនៃជនបរទេសក្នុងវិស័យសេវាកម្ម និងទី២. គឺដើម្បីលើកទឹកចិត្តដល់ការវិនិយោគនៅក្នុងប្រទេសកម្ពុជា។ សូមជម្រាបជូនដែរថាសេចក្តីជូនដំណឹងរបស់ក្រសួងការងារចុះថ្ងៃទី ០៥ តុលា បានអនុញ្ញាតឡើងវិញឲ្យជនបរទេសដែលរស់នៅលើទឹកដីកម្ពុជាអាចប្រកបមុខរបរបានគ្រប់ប្រភេទ។ ជាសេចក្តីសម្រេច ដែលបានលុបលើសេចក្តីប្រកាសមួយរបស់ក្រសួង កាលពីខែសីហា ដោយត្រូវបានហាមឃាត់សកម្មភាពប្រកបមុខរបរដោយជនបរទេសនៅកម្ពុជាចំនួន១០។ ក្នុងនោះរួមមាន ការប្រកបមុខរបរជាអ្នកបើកបរយានជំនិះគ្រប់ប្រភេទជាលក្ខណៈអាជីវកម្ម អ្នកលក់ដូរ អ្នកម៉ាស្សា ជាងកាត់សក់ អ្នកផ្តល់សេវាកម្មដេរនិងសម្អាតស្បែកជើង ជាងកាត់ដេរ ជាងប៉ះកង់ ជាងជួសជុលយានយន្ត អ្នកផលិតវត្ថុអនុស្សាវរីយ៍ខ្មែរ អ្នកផលិតឧបករណ៍ភ្លេងខ្មែរ បាត្រលោក ឬព្រះពុទ្ធរូបនិងជាងទងជាដើម។បើសេចក្តីសម្រេចកាលណោះបានព្រមានថាជនបរទេសទាំងឡាយណា ដែលប្រកបមុខរបរដែលបានរៀបរាប់ខាងលើនឹងមិនត្រូវបានផ្តល់ ឬមិនបន្តសុពលភាពបណ្ណឬសៀវភៅការងារជូនឡើយ។ ហើយលើសពីនេះ នឹងត្រូវប្រឈមនឹងការពិន័យជាប្រាក់និងផ្តន្ទាទោសតាមច្បាប់ថែមទៀត៕
