អាជ្ញាធរខណ្ឌពោធិ៍សែនជ័យ ចុះឃាត់ខ្លួននារីបម្រើសេវាផ្លូវភេទតាមដងផ្លូវវេងស្រេង ជាច្រើននាក់
កម្លាំងគណៈបញ្ជាការឯកភាពរដ្ឋបាលខណ្ឌពោធិ៍សែនជ័យ បានប្រមូល និងឃាត់ខ្លួននារី បម្រេីសេវាផ្លូវភេទ នាំគ្នាឈរពពាក់ពូននៅតាមដងផ្លូវសាធារណៈ ត្រូវបានអាជ្ញាធរខណ្ឌពោធិ៍សែនជ័យធ្វើឃាត់ខ្លួនដើម្បីការយកទៅអប់រំណែនាំ។
ក្នុងប្រតិបត្តិការនេះ បានធ្វើឡើងនៅវេលាម៉ោង ៨យប់ថ្ងៃទី១៥ ខែមិថុនា ឆ្នាំ២០២៣ ក្រោយមានបទបញ្ជាលោក សក់ ច័ន្ទកញ្ញារិទ្ធ អភិបាលខណ្ឌពោធិ៍សែនជ័យ បានចាត់ឲ្យ លោក អុិត ជំនិត និងលោក ផុន សុផាន អភិបាលរង ដឹកនាំកម្លាំងគណៈបញ្ជាការឯកភាពរដ្ឋបាលខណ្ឌ ពោធិ៍សែនជ័យចុះប្រមូលនារីៗបម្រេីសេវាផ្លូវភេទ នៅចំណុចផ្លូវចោមចៅ(ផ្លូវវេងស្រេង) មូលដ្ឋានសង្កាត់ចោមចៅទី១ ខណ្ឌពោធិ៍សែនជ័យ ជាលទ្ធផលប្រមូលបានសរុបចំនួន ៣៤នាក់ ក្នុងនោះមានភេទទី៣ ចំនួន១១នាក់។
ប្រភពព័ត៌មានពីកន្លែងកេីតហេតុ បានឲ្យដឹងថា ក្រោយមានសេចក្ដីរាយការណ៍ពីប្រជាពលរដ្ឋឃើញក្រុមនារីៗរកស៊ីផ្លូវភេទតាមដងផ្លូវអង្គុយឬឈរចាំហៅម៉ូយយ៉ាងអនាធិបតេយ្យ ថែមទាំងមានរឿងមិនឈប់ឈរ ធ្វើឲ្យមានការប៉ះពាល់ដល់សណ្ដាប់ធ្នាប់ និងសង្គម ទើបកម្លាំងគណៈបញ្ជាការឯកភាពខណ្ឌពោធិ៍សែនជ័យចុះបង្ក្រាប និងឃាត់ខ្លួនក្រុមនារីៗទាំងនោះយកទៅអធិការដ្ឋាននគរបាលខណ្ឌពោធិ៍សែនជ័យដេីម្បីធ្វេីការអប់រំ។
បច្ចុប្បន្ន ក្រុមនារីប្រកបមុខរបរបម្រេីសេវាផ្លូវភេទទាំងនោះត្រូវបានអាជ្ញាធរធ្វើការអប់រំណែនាំ មិនឲ្យបន្តមកឈរតាមដងផ្លូវសាធារណៈបែបនេះបន្តទៀតឡើយ ក្នុងករណីមិនរាងចាលនោះអាជ្ញាធរនឹងចាត់ការតាមនីតិវិធី៕
