កោះចំនួនបីទៀតក្នុងខេត្តកែបត្រូវបានប្រគល់ឲ្យក្រុមហ៊ុនឯកជនវិនិយោគ
(កែប) ៖ បន្ទាប់ពីកោះមួយចំនួន និងកោះទន្សាយដែលកំពុងមមាញឹកក្នុងការស្ថាបនាហេដ្ឋារចនាសម្ព័ន្ធពាក់ព័ន្ធនឹងវិស័យទេសចរណ៍ កោះចំនួនបីបន្ថែមទៀតស្ថិតនៅដែនសមុទ្រខេត្តកែបត្រូវបានក្រុមប្រឹក្សាអភិវឌ្ឍន៍កម្ពុជាសម្រេចឲ្យក្រុមហ៊ុន SAMANEA CO., LTD វិនិយោគដោយប្រើប្រាស់ទុនចំនួន១៨,២លានដុល្លារ។
លោកសោម ពិសិដ្ឋ អភិបាលខេត្តកែបបានមានប្រសាសន៍ថា ខេត្តកែបមានកោះចំនួន១២ និងថ្មប៉ប្រះទឹកមួយដែលពោរពេញដោយសក្តានុពលក្នុងការអភិវឌ្ឍន៍វិស័យទេសចរណ៍។ កាលពីថ្ងៃទី២ ខែកញ្ញា ឆ្នាំ២០២២ ក្រុមប្រឹក្សាអភិវឌ្ឍន៍កម្ពុជាបានសម្រេចឲ្យក្រុមហ៊ុន SAMANEA CO., LTD វិនិយោគលើកោះស្វាយ កោះម្ទេស និងកោះកុកស្ថិតនៅភូមិសាស្ត្រសង្កាត់កែប ក្រុងកែប ខេត្តកែបក្នុងទំហំទឹកប្រាក់១៨,២លានដុល្លារ។ គម្រោងវិនិយោគនេះ ក្រុមហ៊ុននឹងផ្តល់ឱកាសការងារបានប្រមាណ៦០កន្លែងផងដែរ។
លោកអភិបាលខេត្តបានបញ្ជាក់ថា ក្រៅពីកោះទាំងបី ក្រុមការងាររបស់ក្រុមប្រឹក្សារអភិវឌ្ឍន៍កម្ពុជាក៏បានចុះមកពិនិត្យកោះត្បាល់មួយទៀតផ្អែកតាមការស្នើសុំវិនិយោគរបស់ក្រុមហ៊ុនទ្រីភាពកោះទន្សាយ។ តាមរយៈកិច្ចសហការរវាងវិស័យរដ្ឋ និងឯកជនលោកសង្ឃឹមថាខេត្តកែបនឹងទទួលផលជាវិជ្ជមានសម្រាប់វិស័យទេសចរណ៍ និងសេដ្ឋកិច្ចដើម្បីលើកកម្ពស់ជីវភាពប្រជាពលរដ្ឋមូលដ្ឋានដែលអាចផ្តល់កន្លែងការងារសំដៅកាត់បន្ថយការធ្វើចំណាកស្រុកនោះ។ ដូចនេះដើម្បីធ្វើឲ្យគម្រោងលេចចេញជារូបរាងឡើង កត្តាដែលសំខាន់គឺគ្រប់មជ្ឈដ្ឋានពាក់ព័ន្ធត្រូវខិតខំជំរុញ និងអនុវត្តទាំងអស់គ្នា។
គួរបញ្ជាក់ថា ក្នុងចំណោមកោះដែលត្រូវរាជរដ្ឋាភិបាលផ្តល់សិទ្ធិឲ្យក្រុមហ៊ុនឯកជនវិនិយោគនោះគឺមានតែកោះទន្សាយមួយប៉ុណ្ណោះកំពុងមមាញឹកក្នុងការសាងសង់គ្រប់ហេដ្ឋារចនាសម្ព័ន្ធទាក់ទិននឹងវិស័យទេសចរណ៍។ កោះក្រៅពីនោះគឺក្រុមហ៊ុនដទៃទៀតទុកនៅទំនេរដោយមិនធ្វើសកម្មភាពអ្វីសោះអស់រយ:កាលយូរឆ្នាំមកហើយ៕
