បុណ្យចូលឆ្នាំថ្មី៣ថ្ងៃ ទេសចរជិត៤លាន៦សែននាក់ចេញដើរកម្សាន្តនៅទូទាំងប្រទេស
របាយការណ៍ក្រសួងទេសចរណ៍បានឱ្យដឹងថា ក្នុងពិធីបុណ្យចូលឆ្នាំប្រពៃណីជាតិខ្មែររយៈពេល៣ថ្ងៃ (១៤-១៦ ខែមេសា ឆ្នាំ២០២២) ភ្ញៀវទេសចរចេញដើរកម្សាន្តនៅទូទាំងប្រទេស សរុបចំនួន៤,៥៩០,៣២៦នាក់ ក្នុងនោះភ្ញៀវជាតិ៤,៥៦១,៤៧៧នាក់ និងភ្ញៀវបរទេសផ្ទៃក្នុង២៨,៨៤៩នាក់។
តួលេខប្រចាំថ្ងៃ បានបង្ហាញថា នៅថ្ងៃទី១៖ ភ្ញៀវមានចំនួន៨៦២,៨៩៧នាក់ ថ្ងៃទី២៖ ភ្ញៀវមានចំនួន១,៥៧៩,២៥១នាក់ និងថ្ងៃទី៣៖ ភ្ញៀវមានចំនួន២,១៤៨,១៧៨នាក់។
សម្រាប់គោលដៅទេសចរណ៍សំខាន់ៗរយៈពេល៣ថ្ងៃនេះ រួមមាន៖ ខេត្តបាត់ដំបង ៥៦៥,៦១៨នាក់ ខេត្តកំពង់ចាម ៥១៤,៤៤៧នាក់ ខេត្តសៀមរាប ៤០០,៥៩១នាក់ ខេត្តបន្ទាយមានជ័យ ៣៨៨,២៧៣នាក់ ខេត្តព្រៃវែង ៣៨២,៨៦៧នាក់ ខេត្តកំពង់ស្ពឺ ៣៣១,៨០៩នាក់ ខេត្តពោធិ៍សាត់ ២៩៨,០៣៧នាក់ខេត្តកំពង់ឆ្នាំង ២៧៥,៤០០នាក់ ខេត្តកំពត ២៥៤,២៧០នាក់ ខេត្តព្រះសីហនុ ២៣២,២៦៤នាក់ រាជធានីភ្នំពេញ ២២២,២២០នាក់។
លោក ថោង ខុន រដ្ឋមន្រ្តីក្រសួងទេសចរណ៍បានបញ្ជាក់ថា ចរន្តភ្ញៀវនាថ្ងៃចូលឆ្នាំប្រពៃណីជាតិថ្ងៃទី៣ គឺមានភាពផុសផល និងកុះករជាងគេ ពោលតួលេខថ្ងៃទី៣នេះបន្តកើនឡើងរហូតដល់ប្រមាណ ៣៦.០២% ធៀបនឹងថ្ងៃទី២។ តួលេខខាងលើ មិនបានរាប់បញ្ចូលប្រជាពលរដ្ឋដែលទៅជួបជុំទទួលអាហារជាលក្ខណៈក្រុមគ្រួសារ នៅតាមអាហារដ្ឋាន និងកន្លែងដែលមានរៀបចំជាខ្យុស (Kiosque) អង្គុយលេងញ៉ាំអាហារ និងចំនួនប្រជាពលរដ្ឋជាច្រើនផ្សេងទៀត ដែលបានរៀបចំជាកម្មវិធីជួបជុំនៅរាំលេងកម្សាន្ត តាមគេហដ្ឋាន និងតាមភូមិស្រុកនោះផងទេ៕
