ឆេះរោងចក្រនៅស្រុកត្រាំកក់ សមត្ថកិច្ចថា ដោយសារឆ្លងចរន្តអគ្គិសនី
រោងចក្រអៅដរហ្គៀ ដែលជារោងចក្រដេរអាវពោងសម្រាប់ហែលទឹកនិងដេរកាបូបមួយកន្លែង សិ្ថតនៅតាមដងផ្លូវជាតិលេខ៣ ចន្លោះគីឡូម៉ែត្រលេខ ៦៦-៦៧ ក្នុងភូមិស្រង៉ែ ឃុំឧត្តមសុរិយា ស្រុកត្រាំកក់ ខេត្តតាកែវ ត្រូវបានអគ្គីភ័យឆាបឆេះបំផ្លាញខូចខាតអស់សម្ភារៈមួយចំនួនធំ កាលពីរសៀលថ្ងៃទី២១ ខែមករា ឆ្នាំ២០២២។
អគ្គីភ័យនេះ បានផ្តើមឆាបឆេះកាលពីវេលាម៉ោង១១នឹង៤០នាទីថ្ងៃត្រង់ ថ្ងៃទី២១ ខែមករា ឆ្នាំ២០២២ រហូតដល់ម៉ោង៧យប់ទើបរលត់អស់។
បើតាមសម្តីកម្មកររោងចក្របម្រើការក្នុងក្រុមហ៊ុននេះឲ្យដឹងថា រោងចក្រនេះ ដេរកាបូបយួនិងអាវពោងសម្រាប់ពាក់ហែលទឹកនិងមានថៅកែជាជនជាតិចិនអ្នកគ្រប់គ្រង ដោយមានកម្មករ កម្មការិនីសរុបចំនួន១៣៩៦នាក់ ស្រី១១២២នាក់ ហើយការឆេះនេះ គឺនៅខណៈពេលដែលកម្មករបានចេញទៅហូបបាយ។
«នៅពេលបងប្អូនយើងកំពុងតែហូបបាយខាងក្រៅរោងចក្រស្រាប់តែមានការឆោឡោឡើងនិងឃើញផ្សែងខ្មៅខ្មួលខ្មាញ់ឆេះចេះពីកន្លែងដាក់សម្ភារៈពីខាងត្បូង។ ឆេះជិតកន្លះម៉ោងទើបមានឡានទឹកទៅជួយបាញ់ពន្លត់តែដោយសារក្នុងរោងចក្រ មានសម្ភារៈសុទ្ធតែជាតិស្នោនិងជ័រនោះទើបធ្វើឲ្យអណ្តាតភ្លើងឆាបឆេះយ៉ាងឆាប់រហ័ស»
លោក សាយ វណ្ណៈ អភិបាលរងស្រុកត្រាំកក់ បញ្ជាក់ថា ករណីអគ្គិភ័យនេះ សមត្ថកិច្ចបានប្រើប្រាស់រថយន្តបាញ់ទឹកអស់ប្រហែល៦០រថយន្តក្នុងការទប់ស្កាត់ ហើយចំពោះទំហ៊ុំនៃការខាត់បង់គឹតជាថវិកា មិនទាន់អាចបញ្ជាក់បានទេ ហើយករណីនេះមិនមានកម្មករ កម្មការិនីណាម្នាក់រងគ្រោះឡើយ។
តាមរបាយការណ៍របស់នាយកដ្ឋានបង្ការ និងពន្លត់អគ្គិភ័យបានឲ្យដឹងថា ករណីអគ្គិភ័យនេះ គឺបានឆេះបំផ្លាញអគារផ្ទុកសំភារៈមួយខ្នងទំហំ ៣៥ម៉ែត្រ x ៤០ម៉ែត្រ ធ្វើពីថ្មប្រក់ស័ង្កសី (ឆេះអស់ទាំងស្រុង) ។ ហើយសម្ភារៈដែលខូចខាតរួមមាន៖ សំបកកាតុងចំនួន ១០ តោន, អាវស្តុកចំនួន ២០០០ កាតុង, ស្នោអេប៉ុងចំនួន ៥០ តោន, ម៉ាស៊ីនក្រឡុកស៊ីម៉ង់ត៍ចំនួន ០១ គ្រឿង, រថយន្តកុងទឺន័រចំនួន ០១ គ្រឿង និង ម៉ូតូចំនួន ០៤ គ្រឿង ។
ដោយឡែកមូលហេតុដែលបណ្តាលឲ្យកើតមានអគ្គិភ័យនេះ នាយកដ្ឋានបានបញ្ជាក់ថា គឺដោយសារឆ្លងចរន្តអគ្គិសនី៕
