ករណីធ្លាក់យន្តហោះនៅហ្វីលីពីន អ្នកស្លាប់កើនដល់៥០នាក់ ខណៈ ៥៣នាក់រងរបួស
ឧត្តមសេនីយ៍ឯក Edgard Arevalo អ្នកនាំពាក្យយោធាហ្វីលីពីនបាននិយាយថា ចំនួនអ្នកស្លាប់ដោយសារការធ្លាក់យន្តហោះនៅលើកោះជូឡូ ក្នុងខេត្តស៊ូលូ កាលពីថ្ងៃម្សិលមិញ បានកើនឡើងដល់ចំនួន ៥០នាក់ ក្នុងនោះមានសមាជិកបុគ្គលិកយោធា ៤៧ នាក់និងជនស៊ីវិល ៣ នាក់។
យន្ដហោះយោធាដឹកអ្នកដំណើរ Hercules C-130 ដឹកនិស្សិតដែលបញ្ចប់ការសិក្សា ៩៦ នាក់ បានធ្លាក់កាលពីថ្ងៃអាទិត្យ (ថ្ងៃទី៤ ខែកក្កដា) ខណៈយន្តហោះនោះគ្រោងនឹងទៅចុះចតនៅព្រលានយន្តហោះជូឡូ ក្នុងខេត្តស៊ូលូ ភាគខាងត្បូងហ្វីលីពីន ប៉ុន្តែក៏បានហោះជ្រុលហួសព្រលាន ដោយសារតែមានបញ្ហាបច្ចេកទេស ហើយនៅពេលមិនអាចគ្រប់គ្រងម្ចាស់ការបានទៀត វាក៏បានធ្លាក់នៅតំបន់ ផាទីកាល់ ដែលស្ថិតនៅក្បែរនោះ។
គ្រោះថ្នាក់ដ៏អាក្រក់នេះដែរ ក៏បានធ្វើអោយប្រជាជននៅលើដី០៣នាក់បានស្លាប់ និង០៤នាក់ទទួលរងរបួសផងដែរ ដោយសារត្រូវយន្តហោះយោធាធ្លាក់ចំទីតាំង ដែលពួកគេកំពុងស្ថិតនៅ ។
រដ្ឋមន្រ្តីការពារជាតិហ្វីលីពីន លោក Delfin Lorenzana បាននិយាយថា លោកបានបញ្ជាឱ្យមានការស៊ើបអង្កេតលើឧប្បត្តិហេតុនេះ ដែលនឹងចាប់ផ្តើមបន្ទាប់ពីប្រតិបត្តិការជួយសង្គ្រោះនិងការស្តារឡើងវិញត្រូវបានបញ្ចប់។
ក្នុងសេចក្តីរាយការណ៍មួយបាននិយាយថា “ ទាហានមួយចំនួនត្រូវបានគេមើលឃើញថាលោតចេញពីយន្តហោះមុនពេលដែលវាបុកដល់ដី ដោយបានជួយពួកគេរស់រានមានជីវិត” ៕