មន្ទីរបញ្ចកោណ ៖ អាមេរិកនឹងរក្សាកងទ័ពប្រហែល៦០០នាក់នៅប្រទេសស៊ីរី
អាមេរិក ៖ ប្រមុខមន្ទីរបញ្ចកោណលោក Mark Esper បាននិយាយកាលពីថ្ងៃពុធថា សហរដ្ឋអាមេរិកនឹងរក្សាកងទ័ពប្រហែល៦០០នាក់នៅក្នុងប្រទេសស៊ីរីថ្វីបើលោក Donald Trump ចង់បញ្ចប់ការចូលរួមរបស់អាមេរិកនៅក្នុងអ្វីដែលប្រធានាធិបតីរូបនេះហៅថា“សង្គ្រាមគ្មានទីបញ្ចប់”ក៏ដោយ។
រដ្ឋមន្ត្រីក្រសួងការពារជាតិអាមេរិកបាននិយាយលើយន្ដហោះនៅពេលលោកធ្វើដំណើរទៅកាន់ទីក្រុងសេអ៊ូលដើម្បីចាប់ផ្តើមដំណើរទស្សនកិច្ចនៅអាស៊ីកាលពីថ្ងៃព្រហស្បតិ៍ថា “យើងនៅតែកំពុងចល័តកងទ័ពចេញពីភាគឦសានប្រទេសស៊ីរី”។ លោកបន្ថែមថា “យើងនឹងមានកងទ័ពប្រហែល៥០០ទៅ៦០០នាក់នៅទីនោះ”។
នៅពេលសួរថាតើតួលេខនេះរាប់បញ្ចូលទាំងកងទ័ពប្រមាណ២០០នាក់ដែលត្រូវបានដាក់ពង្រាយនៅមូលដ្ឋាន Al-Tanf នៅជិតព្រំដែនភាគអាគ្នេយ៍ជាប់ប្រទេសហ្សកដានី និងអ៊ីរ៉ាក់ដែរឬក៏អត់នោះ, លោក Esper បាននិយាយថា លោកសំដៅទៅភាគឦសានប្រទេសស៊ីរីដែលជាកន្លែងលោក Trump បានណែនាំឲ្យមន្ទីរបញ្ចកោណការពារតំបន់ប្រេង។
លោក Esper បាននិយាយថា ចំនួននេះអាចនឹងប្រែប្រួលជាពិសេសប្រសិនបើសម្ព័ន្ធមិត្តអឺរ៉ុបពង្រឹងវត្តមានរបស់ពួកគេនៅក្នុងប្រទេសនេះ។ ការប្រកាសភ្លាមៗរបស់លោក Trump កាលពីខែមុនថា លោកបានបញ្ជាឲ្យដកកងទ័ពទាំងស្រុងគឺបានបង្កឲ្យមានការរិះគន់យ៉ាងខឹងសម្បាទាំងក្នុងនិងក្រៅប្រទេស។
ក្រុមអ្នករិះគន់បាននិយាយថា វាអាចអនុញ្ញាតឲ្យក្រុមរដ្ឋឥស្លាមលេចមុខសារជាថ្មីហើយទុកឲ្យពួកយុទ្ធជនឃើដដែលជាសម្ព័ន្ធមិត្តអាមេរិកនៅស៊ីរីងាយរងគ្រោះដោយការលុកលុយរបស់ទួរគី។ ក្រោយមក ប្រធានាធិបតីអាមេរិកបាននិយាយថា លោកនឹងទុកកងទ័ពមួយចំនួននៅក្នុងតំបន់ដើម្បីការពារទីតាំងប្រេងដែលងាយរងគ្រោះ៕