រដ្ឋាភិបាលដកហូតកំពង់ផែទេសចរណ៍នៅចុងឃ្នៀសរបស់ក្រុមហ៊ុនឯកជន ប្រគល់ឲ្យអាជ្ញាធរខេត្តសៀមរាបគ្រប់គ្រងវិញ
យោងតាមលិខិតមួយរបស់ទីស្តីការគណៈរដ្ឋមន្រ្តី បានបង្ហាញថា រាជរដ្ឋាភិបាលកម្ពុជា បានសម្រេចលុបគោលការណ៍វិនិយោគសាងសង់កំពង់ផែទេសចរណ៍នៅតំបន់ចុងឃ្នៀស ដែលអភិវឌ្ឍន៍ដោយក្រុមហ៊ុន ស៊ូ ជីង និងដកហូតទីតាំងវិនិយោគទាំងស្រុងរបស់ក្រុមហ៊ុននេះ រួចប្រគល់ឲ្យរដ្ឋបាលខេត្តសៀមរាប និងគ្រឹះស្ថានអង្គរ គ្រប់គ្រងជាបណ្ដោះអាសន្ន ។
ជាមួយគ្នានេះ គណៈកម្មការអន្តរក្រសួងមួយនឹងត្រូវបង្កើតឡើង ដែលដឹកនាំដោយក្រសួងសេដ្ឋកិច្ច និងហិរញ្ញវត្ថុ និងមានការចូលរួមពីតំណាងទីស្តីការគណៈរដ្ឋមន្ត្រី ក្រុមប្រឹក្សាអភិវឌ្ឍន៍កម្ពុជា ក្រសួងរៀបចំដែនដី នគរូបនីយកម្ម និងសំណង់ រដ្ឋបាលខេត្តសៀមរាប និងស្ថាប័នជំនាញពាក់ព័ន្ធ ដើម្បីត្រៀមដោះស្រាយជាយថាហេតុអំពីសំណើ សុំទូទាត់សំណងគម្រោងវិនិយោគ របស់ក្រុមហ៊ុន ស៊ូជីង ផត អ៊ិនវេសមិន ដោយឈរលើគោលការណ៍យុត្តិធម៌ សមធម៌ តម្លាភាព និងគណនេយ្យភាព ជាមួយនឹងការទូទាត់បំណុលពន្ធរបស់ក្រុមហ៊ុន ។
