រុស្ស៊ីវាយប្រហារលើកំពង់ផែអូដេសសា ក្រោយចុះកិច្ចព្រមព្រៀងជាមួយអ៊ុយក្រែនក្នុងការបើកកំពង់ផែនេះដើម្បីនាំចេញគ្រាប់ធញ្ញជាតិបានមួយថ្ងៃគត់
កាំជ្រួចរបស់រុស្ស៊ីបានវាយប្រហារកំពង់ផែអូដេសសារបស់អ៊ុយក្រែនកាលពីថ្ងៃសៅរ៍ នៅក្នុងអ្វីដែលរដ្ឋាភិបាលទីក្រុងគៀវហៅថា«ការស្តោះទឹកមាត់ដាក់មុខ»លើកិច្ចព្រមព្រៀងដែលទើបមានអាយុកាលបានមួយថ្ងៃរវាងភាគីសង្គ្រាមទាំងពីរដើម្បីបន្តការនាំចេញគ្រាប់ធញ្ញជាតិដែលកន្លងមកត្រូវបានរាំងខ្ទប់ដោយជម្លោះប្រដាប់អាវុធ។
ទោះជាយ៉ាងណានៅមិនទាន់មានប្រតិកម្មឬការទទួលស្គាល់ពីភាគីរុស្ស៊ីចំពោះការអះអាងនេះនៅឡើយទេ។
យោធាអ៊ុយក្រែនបាននិយាយថា ផ្នែកការពារដែនអាកាសរបស់ខ្លួនបានបាញ់ទម្លាក់កាំជ្រួចបញ្ជានាំផ្លូវចំនួនពីរដើម តែពីរដើមទៀតធ្លាក់ចំតំបន់កំពង់ផែ ដែលវាគំរាមដល់កិច្ចព្រមព្រៀងសំខាន់ជាប្រវត្តិសាស្ត្រមួយដែលសំរេចឡើងក្រោយការចរចាអស់រាប់ខែដើម្បីសម្រាលវិបត្តិស្បៀងសកល។
អ្នកនាំពាក្យក្រសួងការបរទេសអ៊ុយក្រែនបាននិយាយថា ការវាយប្រហារនេះជា«ការស្តោះទឹកមាត់ដាក់មុខ»ដោយប្រធានាធិបតីរុស្ស៊ីលោកវ្ល៉ាឌីមៀ ពូទីន លើកិច្ចព្រមព្រៀងដែលសម្របសម្រួលដោយប្រធានាធិបតីតួកគី និងអគ្គលេខាអង្គការសហប្រជាជាតិ។
ក្នុងពេលជាមួយគ្នា ប្រធានាធិបតីអ៊ុយក្រែនលោកហ្សេលេនស្គី បានអះអាងថាការវាយប្រហារលើក្រុងអូដេសសាបង្ហាញថា រដ្ឋាភិបាលទីក្រុងមូស្គូនឹងមិនគោរពការសន្យារបស់ខ្លួន។
សូមបញ្ជាក់ថា អូដេសសា (Odessa)ជាមជ្ឈមណ្ឌលនាំចេញមួយក្នុងចំណោមមជ្ឈមណ្ឌលដូច្នេះចំនួនបីដែលមានចែងក្នុងកិច្ចព្រមព្រៀង ហើយមន្ត្រីអ៊ុយក្រែនបាននិយាយថា គ្រាប់ធញ្ជជាតិកំពុងស្តុកទុកនៅកំពង់ផែនេះពេលមានការវាយប្រហារ តែទំនងជាមិនរងការខូចខាតទេ។
អគ្គលេខាអង្គការសហប្រជាជាតិ ដែលបានធ្វើជាសាក្សីនៃការចុះហត្ថលេខាលើកិច្ចព្រមព្រៀងកាលពីថ្ងៃសុក្រ បានថ្កោលទោសការវាយប្រហារនេះ និងបានទទូចសុំអោយគ្រប់ភាគីគោរពកិច្ចព្រមព្រៀង។
ក្នុងពេលជាមួយគ្នា ប្រធានគោលនយោបាយបរទេសរបស់សហភាពអឺរ៉ុប លោក ចូសេប ប័ររ៉ែល(Josep Borrell) បានបន្ទោសរុស្ស៊ីដោយផ្ទាល់ចំពោះការវាយប្រហារនេះ។លោកបាននិយាយថា«ការវាយប្រហារនេះផ្តោតលើការនាំចេញគ្រាប់ធញ្ញជាតិ នៅពេលតែមួយថ្ងៃក្រោយការចុះហត្ថលេខានៅទីក្រុងអ៊ីស្តាន់ប៊ុល ហើយវាបង្ហាញជាថ្មីថា រុស្ស៊ីមិនគោរពច្បាប់អន្តរជាតិទាំងស្រុងនិងការប្តេជ្ញាចិត្តរបស់ខ្លួន»។
អង់គ្លេសនិងអាម៉េរិកក៏ថ្កោលទោសការវាយប្រហារនេះ ដោយរដ្ឋមន្ត្រីការបរទេសអាម៉េរិកនិយាយថាវា«បង្កការមន្ទិលជាខ្លាំងអំពីជំនឿលើការប្តេជ្ញាចិត្តរបស់រុស្ស៊ីចំពោះកិច្ចព្រមព្រៀង»៕
